Tum Se Kiya Kahein Jaanaa

Zindagi k meyley mein,,khowahishon k reley mein

Tum sey kiya kahein jana,,is qadar jhameley mein

Waqt ki ravani hai,,bakht ki girani hai

Sakht bezamini hai,,sakht laamakani hai

Hijr k samandar mein

Takht aur takhtey ki eik he kahani hai

Tum ko jo sunani hai

Baat go zara si hai

Baat umer bhar ki hai

Umer bhar kii baatein kab do ghari mein hoti hain

dard k samandar mein

Ungenat jazeerein hein,beyshumaar moti hain

Aankh k jazerey mein tum ne jo sajaayaa thaa

Baat us diye ki hai

Baat us giley ki hai

Jo lahuu ki Khilvat mein chor ban k aataa hai

Lafz k fasilon par---Tuut tuut jaata hai

Zindagi se lambi hai baat rat_jage ki hai


Raaste mein kaisey milein baat takhliye ki hai

Takhliye ki baaton mein guftaguu izaafi hai

Piyaar karane waalon ko eik nigaah kaafi hai

Ho sake to sun jaao eik din akeley mein

Tum se kiya kahein jaanaa

is qadar jhameley mein. . .

"Mohabbat Tor Sakti Hai"

Koi Zanjeer Ho Usko Mohabbat Torr sakti hai

Jidhar Chahe ye Bagein Zindagi ki Morr Sakti hai

Mohabbat Rok Sakti hai Kisi Girtey Sitarey Ko

Kisi Jaltey Shararey Ko , Fana Kay Shuaarey ko

Ye Chikna Chour Aaenay Ki kricheian Jorr Sakti hai

Koi Zanjeer Ho, usko Mohabbat Torr sakti hai

Muhabbat Per kisi bhi Rasm ka Pehra nahi chalta

Kisi Aamr ,Kisi Sultan ka Sikka nahi Chalta

Ye her Zindaan Ki Aandhi Salakhein Torr sakti hai

Koi Zanjeer Ho Usko Muhabbat Torr Sakti hai

Ye Jab chahey Kisi Bhi khowab ki Tabeer Mil Jaye

Kisi Rastey mein Raasta Poochti ,Taqdeer Mil jaye

Samey kay Taiz Dharoon ko Ye pichey Chorr Sakti hai

Koi Zanjeer Ho , Uss ko Muhabbat Torr Sakti hai

''Ghazal''

Bhier mein ik ajnabi ka samna acha laga

sab se chup kar woh kisi ka dekhna acha laga

Surmai aankhon k niche phool se khilne lage

kehte kehte kuch kisi ka sochna acha laga

Baat to kuch bhi nahi thi lekin us ka ek dam

hath ko honton pe rakh kar rokna acha laga

Chay main chini milana us ghari bhaya bohat

zer-e lab vo muskurata shukriya acha laga

Dil main kitne ahad bandhe the bhulane ke use

woh mila to sab iradey torna acha laga

Beirada lams ki woh sansani pyari lagi

kam tawajjo ankh ka woh dekhna acha laga

Nim shab ki Khamushi main bhigti sarkon pe kal

teri yadon k jalo main ghumna acha laga

Us udu-e-jan ko 'Amjad' main bura kaise kahun

jab bhi aya samne woh bewafa acha laga

"MAA"

Yeh kaamyabiyan izzat yeh naam tum se hai

Khuda ne jo bhi diya hai maqam tum se hai

Tumhare dam se hain mere lahoo mai khiltey gulaab

Mere wujood ka saara nizam tum se hai

Kahan bisaat-e-jahan aur mai kamsin aur nadaan

Yeh meri jeet ka sab ahtemam tum se hai

Jahan jahan hai meri dushmani sabab mai hoon

Jahan jahan hai mera ahteraam tum se hai

Yeh jo tum bhool jaya kerte ho

Kis qadar zulm dhaya kertey ho

Yeh jo tum bhool jaya kertey ho

Kis ka ab haath rakh ke seeney per

Dil ki dhadhkan sunaya kertey ho

Hum jahan chaye peeney jatey thay

Kiya wahan ab bhi aaya kertey ho

Kon hai ab ke jis ke chehrey per

Apni palkon ka saaya kertey ho

Kiun mere dil mein rakh nahi detey

Kis liye gham uthaya kertey ho

Phone per geet jo sunatey thay

Ab wo kis ko sunaya kertey ho

Akhiri khat mein usney likha tha

Tum mujhe yaad aaya kertey ho

"Kaise tujhe sada detey"

Dayar-e-ghair mein kaisey tujhe sada detey

Tu mil bhi jata to tujhe ganwa detey

Tumhe ney hum ko sunaya na apna dukh warna

Dua wo kartey k hum aasman hila detey

Hamein ye zom raha ab k wo pukarengey

Unhein ye zid thi k her bar hum sada detey

Woh tera gham tha k taseer mere lahjey ki

K jis ko hall sunatey usey rula detey

Tumhen bhulna he awwal to dastaras mein nahi

Jo ikhtiyar bhi hota to kiya bhula detey

Tumhari yaad ney koi jawab he na diya

Merey khayalon k aansou rahey sada detey

Sama'ton ko main ta-umrr kosta Syed

Woh kuch na kahtey magar hont to hila detey